今次係同肥華的二人旅行, 開始選擇地點時都偏向有日出影風景的地方, 聞說阿里山有日出和雲海影, 最終決定走返轉4日3夜高雄阿里山之旅。
最初構思係阿里山加日月潭, 但出發前得知這幾天會下雨, 最後取消了去日月潭, 改去高雄Snap Shot下。
第一天, 到達高雄後原本會再轉乘旅遊巴去阿里山, 但一出火車站時, 有條亞姐極力推介我地搭佢架7人車, 仲話有4位靚女已經答應會坐車, 先載我地兩個後再去接嗰4位靚女, 仲話坐巴士好辛苦, 啲坐好窄, 一聽到佢講呢句, 即刻想轉軚去搭7人車, 兩條仔去旅行, 心諗有咩事最多跳車啫, 仲有4位靚女相伴, 應該無咩嘢掛, 於是就開始左我地阿里山之旅了。
講返個4位靚女, 原來係4位婆婆, 真係比亞姐坤左, 唯一安慰係架7人車真係好舒服, 可以瞓足全程。
去到差不多山頂時, 在車上已經見到有雲海, 自己咁大個人都係第一次親眼望到, 到達後去酒店辨完手續, 立刻飛奔到阿里山火車站附近影雲海
在網上隨便選一間的櫻山大飯店, 去到山頂要求不太高, 感覺還可以
食完晚飯後8:30左右, 無嘢做去左火車站附近行下, 起初時好大霧, 但後來霧漸漸散開, 抬頭一望滿天星星和一個大月亮, 有一種時來運到的感覺
第二天早上參加了玉山日出團, 早上四點出車, 先出發參觀神木, 其實4點天都未光, 都唔知有乜好介紹, 開始感覺好似上左賊船, 到天光時份帶我地去左個唔知乜地方, 導遊話太陽係對面座山升起就係玉山日出, 心諗天都已經光晒, 仲講乜鬼嘢日出呀! 同原先所想像的日出落差很大, 有少許失望, 只怪自己事前無做好功課, 下次再有機會出國影日出真係要上網查清楚先得。
睇完日出返回飯店都只不過係早上7點左右, 所以決定瞓返幾個鐘先再出發去睇阿里山名物神木, 當日天氣的變化很大, 出發時還是藍天白雲, 但到了中午時份已經開始大霧和細雨, 壞天氣比天文台的預測遲了一天, 其實都叫做好彩, 可以玩到一個上午。
第三天早上, 決定自己搭火車上阿里山最出名的祝山睇日出, 但其實都知道會落雨, 睇到日出的機會好細, 不過嚟到阿里山, 唔上過祝山又點得呢, 所以都係要上去睇睇。 原本諗住落雨應該無咩人上, 點知架火車都係滿座, 落車後天氣比想像中仲要差, 橫風橫雨, 影左幾張相後見唔太對路, 最終都係返火車入面等開車。
這是在阿里山的最後一個景點, 之後我們就座車返回高雄, 待續.......
No comments:
Post a Comment