大東山 / Sunset Peak

大東山兩日一夜團可以講係自己攝影的大Project, 一般影相好少過夜。 話說點解會攪呢個大Project, 事源係司長和團長在上個月夜闖過一次鳯凰山, 食左好嘢當然係翻尋味, 之後司長就擇日出團, 點知出發前一日佢突然放飛機, 心諗都唔知去唔去好, 但假都已經攞左, 天氣又好似幾好, 照去也。

諗住一次過玩盡啲, 所以星期五請了一天假, 中午與團長在青衣集合, 買好露營所需要的食物和用品後就出發上大東山。 自己都是第一次露營加影相, 心情非常興奮, 但原來過夜要準備很多的東西, 上山前背包保守估計有三十幾磅重, 幸好當日天氣十分清涼, 上山時雖辛苦但未至於滿頭大汗。起步點在伯公坳出發, 上山路程大約花了一個多小時, 到達後我們選了最高位的一間白色小屋, 扎好營後便向日落地標柱位進發, 日落方向面對鳯凰山, 前景只得一座小山, 老實講真係無咩特別, 但要食到盡的我地又點會放過所有機會 。

玩完第一波後, 係時候要休息下, 煮下晚餐(都係香腸即食麵啫), 食飽後天空已經漆黑一片, 抬頭一望, 滿天都是星星, 自己生活在香港, 真係好少見, 之前都無乜影星的經驗, 但原來在漆黑的環境下, 不論你部相機對焦有幾勁, 都係對唔到的, 這時最好都係把對焦調到MF 無限遠, 影起來會比方便。當影完一輪星星, 諗住回營瞓覺的時候, 詭異的事情就開始發生了, 我地發覺原本放在膠袋內一包開過的香腸忽然在路中心出現, 當再細心檢查下, 有條香腸竟然比嘢咬左一啖, 我和團長心裡都寒一寒, 唔係有米奇老鼠咁邪呀, 仲要比佢偷嘢食, 當大家還在懷疑之際, 就見到米奇大模斯樣的行過來, 個勢似係想家返屋企, 呢一刻當然係要趕佢走啦! 最慘的一件事情係食物已經買得唔多, 包腸仲要比佢咬左啖, 都唔敢再食, 所以明早只能食齋麵。

到了11點左右, 係時候要瞓返覺, 迎接明早日出的來臨, 但估唔到米奇的大報復係呢一刻開始, 成晚係到吱吱咁叫, 嘈住晒。 一波未平, 一波又起, 到了約一兩點的時候, 已經入睡的我忽然間凍醒, 即刻開個天文台APPS睇下幾多度, 發現原來溫度急降, 市區得10度, 而身處於新界山頂的我, 應該得返5,6度, 其實我已經著左兩條褲, 羽絨再加保暖內衣, 但之後每當瞓着幾分鐘後就會自然凍醒, 而團長準備比我充足, 帶了睡袋, 一覺瞓天光, 唔比個叻佢都唔得。

成晚無咩點瞓累爆的我終於捱到天光, 在Magic hour前一刻天空的雲比較多, 心諗呢次好大機會high嘢, 但奇妙的事情又發生了, 忽然有大風吹散向日出位的雲層, 有Magic之餘, 之後仲有魚鱗雲, 火燒天, 咸蛋黃, 蘇光, 真係你想要咩有咩, 好似黃興桂話齋(有今生, 無來世呀)。 興奮完一個清晨, 太陽出來後天氣回暖了, 大家都覺得係時候要再補一補, 瞓返幾粒鐘後再執嘢落山。

後記, 第一次食正日出, 日落加星空, 機會真係十分難得, 如下次再有機會上山露營, 一定要買一個保暖的睡袋和行山用的背包, 唔駛捱冷, 上山時又可以咩得舒服, 最後要特別鳴謝司長在一個月前已經幫我地選左呢一日, 又幫我地借埋東風, 簡直係諸葛再世。

青衣三支香日落 / Tsing Yi Hill sunset

今次日落三支香有Keith 和團長, 又嚟三上三落, 多兩個人同行, 自己也單挑過一次, 所以感覺不太辛苦, 影完後發覺三支香望昂船洲大橋呢個位置, 最啱都係影日出, 冬天日出會在大橋位上, 而夏天就係大帽山上, 下次再重來時一定係日出三支香

觀塘裕民坊 / Kwun Tong Yue Man Square

當知道裕民坊真係就嚟要拆時, 真係要把握最後機會來一次夜攝

感覺人流比上一次到來時稀疏了不少, 大部分地方都已經關閉了, 只剩下空虛的街道和廢置的大廈, 對舊區嚟講, 重建是無可避免, 但希望政府在重建的同時, 可以保留少許舊有的特別, 不要周圍全都是商場百貨店和那些假豪宅, 攪到每個地區太一色一樣吧!

屯門青山 / Tuen Mun Tsing Shan

之前從未諗過會上青山, 但近期同事間有人提議上去影日落, 等到落實日期後就跟隊上山。  今次是少有的五人行, 和Kevin, Keith, 團長, 司長乘的士到青山襌院下車, 再攻上山頂。  當日天氣十分悶熱, 而上青山的路段比想像中辛苦很多, 各人步行速度有快有慢, 但最終全體隊員也能成功登頂, 到達山頂時, 天氣實在是麻麻, 比較多雲和有少許煙霞, 但到了Magic時份, 天色突然轉好了一點, 雲層也漸漸散開了, 所以今次未至於食白果。